माढ्याचा पुढील खासदार काँग्रेसचा: पृथ्वीराज चव्हाण; राष्ट्रवादी काँग्रेसच्या जागेवर दावा

लोकसभेच्या तयारीला लागा; पृथ्वीराज चव्हाणांच्या कार्यकर्त्यांना सूचना.

लोकमत न्यूज नेटवर्क, सातारा : राष्ट्रवादी काँग्रेसच्या जागेवर काँग्रेसने दावा केल्याने आता नवे पेच निर्माण होण्याची शक्यता आहे. माढ्याचा पुढील खासदार काँग्रेसचा असेल, असा दावा माजी मुख्यमंत्री पृथ्वीराज चव्हाण यांनी केला आहे. माढा लोकसभा मतदारसंघातील माण, खटाव आणि फलटण विधानसभा मतदारसंघनिहाय प्रमुख काँग्रेस कार्यकर्त्यांची बैठक दहिवडी येथील सिद्धनाथ मंगल कार्यालयात झाली. त्यावेळी बोलताना त्यांनी कार्यकर्त्यांना लोकसभेच्या तयारीला लागा, असे सुचवले. 

पृथ्वीराज चव्हाण यांनी माढा लोकसभा मतदारसंघाचा दौरा केला. त्यावेळी ते म्हणाले, पुढील खासदार काँग्रेसचाच असेल. राष्ट्रवादीच्या जागेवर दावा केल्याने राजकीय वर्तुळात चर्चा सुरू झाली आहे. भाजप खासदार निवडून आपण नुकसान करून घेतल्याची जाणीव इथल्या मतदारांना झाली आहे. तर, मोदी सरकारमुळे देश आर्थिक संकटाकडे वाटचाल करतोय. शेतकऱ्यांना मदत करण्याऐवजी राज्य सरकार बदल्यांमध्ये भ्रष्टाचार करत आहे. एकनाथ शिंदे हे फक्त नावापुरतेच मुख्यमंत्री आहेत, असा टोलाही पृथ्वीराज चव्हाण यांनी लगावला. 

दरम्यान, या मतदारसंघात स्वतंत्रपणे निवडणूक लढल्यास खासदार काँग्रेसचाच होईल, असे काँग्रेस जिल्हाध्यक्ष धवलसिंह मोहिते पाटील यांनी म्हटले. दरम्यान, २००९ मध्ये माढा मतदारसंघातून राष्ट्रवादीचे सर्वेसर्वा शरद पवार यांनी निवडणूक लढवली. त्यावेळी, राष्ट्रवादीने ही जागा जिंकली. तर, २०१४ मध्ये विजयसिंह मोहिते पाटील खासदार बनले. त्यांनी सदाभाऊ खोत यांचा पराभव केला. त्यानंतर, २०१९ मध्ये या जागेवर रणजीतसिंह नाईक निंबाळकर आणि राष्ट्रवादीच्या संजय शिंदेंमध्ये लढत झाली. त्यात, रणजीतसिंह नाईक निंबाळकर यांचा विजय झाला होता. मात्र, आता काँग्रेसने थेट या जागेवर दावा केला आहे. त्यामुळे, महाविकास आघाडीत नेमके कोण ही जागा लढणार हे पाहावे लागेल.