पुण्याच्या युवकाची पाचगणीत आत्महत्या

शेतात विषप्राशन : सडलेल्या अवस्थेत पांगारी ग्रामस्थांना आढळला मृतदेह

भिलार : पाचगणी-महाबळेश्वर मुख्य रस्त्यावर असणाऱ्या भिलार वॉटर फॉलजवळ एका युवकांने विषारी औषध पिऊन आत्महत्या केल्याची घटना समोर आली आहे.संग्राम सुरेश गरूड (वय, २०, रा. बेलसर, ता. पुंरदर, जि. पुणे) असे आत्महत्या केलेल्या युवकाचे नाव आहे. पाचगणी पोलीस ठाणे व घटनास्थळावरून मिळालेली माहिती अशी की, पांगारी हद्दीत येणाऱ्या भिलार वॉटर फॉलच्या समोरील बाजूस डोंगराळ भागात राजाराम धोडींराम भिलारे यांच्या ‘पडान’ या शेतात एका युवकाचा मृतदेह आढळून आला. या घटनेची माहिती भिलारचे पोलीस पाटील गणपत महादेव भिलारे यांनी पाचगणी पोलीस ठाण्याला दिली. यानंतर पोलिसांनी घटनास्थळी येऊन पाहणी केली. संबंधित मृतदेह सडलेल्या अवस्थेत होता. पोलिसांना मृतदेहाशेजारी विषारी औषधाच्या बाटल्या व एक बॅग सापडली. बॅगेत सापडलेल्या कागदपत्रांच्या आधारे संबंधित मृतदेह संग्राम गरूड नावाच्या युवकाचा असल्याचे स्पष्ट झाले. त्याने विषारी औषध प्राशन करून आत्महत्या केल्याचा अंदाज पोलिसांनी व्यक्त केला आहे. पाचगणी पोलीस ठाण्याचे सहायक पोलीस निरीक्षक बाळासाहेब भरणे याच्या मार्गदर्शनखाली पोलीस तपास करीत आहेत. (प्रतिनिधी)कारण अस्पष्टसंग्राम हा वडगाव बुद्रुक (पुणे) येथील वेणुताई चव्हाण पॉलिटेक्निक येथे शेवटच्या वर्षाला शिकत होता. तो परीक्षेत नापास झाला होता. कुटुंबीयांच्या सांगण्यानुसार संग्रामवर मानसोपचारतज्ज्ञांकडे उपचार सुरू होते. मात्र, आत्महत्येचे नेमके कारण अद्या स्पष्ट झाले नसल्याचे पोलिसांनी सांगितले.