शिवथर : आरफळ (ता. सातारा) येथे ग्रामपंचायतीच्यावतीने जिल्हा परिषदेच्या प्राथमिक शाळेत विलगीकरण कक्ष स्थापन करण्यात आला आहे. या कक्षाचे उद्घाटन सरपंच मेघा माने यांच्या हस्ते करण्यात आले.
तहसीलदार आशा होळकर यांनी दिलेल्या सूचनेनुसार आरफळ ग्रामपंचायत व ग्रामस्थांनी आदर्श काम करताना गावातील ग्रामस्थांच्या आरोग्यासाठी तसेच गृह अलगीकरणामध्ये येणाऱ्या अडचणींवर मात करण्यासाठी ग्रामस्थ व ग्रामपंचायतीच्या स्वनिधीतून गावातील जिल्हा परिषदेच्या शाळेमध्ये दहा बेडच्या विलगीकरण कक्षाचे उद्घाटन मंगळवारी करण्यात आले. या सेंटरमध्ये सौम्य लक्षणे असणाऱ्या रुग्णांचे विलगीकरण केले जाणार आहे. या कक्षाला तहसीलदारांनी भेट देऊन ग्रामपंचायतीच्या कामाचे कौतुक केले. या कक्षाच्या उद्घाटनप्रसंगी ग्रामविकास अधिकारी दादासाहेब बनकर, तलाठी पिसे, उपसरपंच सुनील पवार, ग्रामपंचायत सदस्य वैभव पवार, अश्विन पवार, सागर पवार, नीलेश साबळे तसेच ग्रामस्थ उपस्थित होते.