चोरीच्या सहा दुचाकी हस्तगत

जावेद दस्तगीर महाबरी (वय २७, रा. आटके, ता. कऱ्हाड) असे याप्रकरणी अटक करण्यात आलेल्याचे नाव आहे. पोलिसांनी दिलेल्या माहितीनुसार, कऱ्हाड शहरासह ग्रामीण भागात गत काही दिवसांपासून दुचाकी चोरीच्या घटना वाढल्या होत्या. या पार्श्वभूमीवर पोलीस उपअधीक्षक रणजित पाटील यांनी उपविभागातील सर्व पोलीस ठाण्यांना या गुन्ह्यांचा गंभीरपणे तपास करण्याच्या सूचना दिल्या होत्या. कऱ्हाड ग्रामीण पोलीस ठाण्याचे निरीक्षक आनंदराव खोबरे यांनीही याबाबत अधिकारी व कर्मचाऱ्यांना सुचित केले होते. त्यानुसार नांदगाव दूरक्षेत्राचे उपनिरीक्षक राजू डांगे, सहायक फौजदार भाऊसाहेब तांदळे, हवालदार विकास सपकाळ, ज्ञानदेव राजे, सचिन गुरव, आशिष पाटील हे दुचाकी चोरीच्या गुन्ह्यांचा तपास करीत असताना जावेद महाबरी याचे नाव समोर आले. पोलीस पथकाने त्याला ताब्यात घेऊन चौकशी केली असता, त्याने नारायणवाडी, मलकापूर येथून सहा दुचाकी चोरल्याचे कबूल केले. त्याच्याकडून चोरीच्या दुचाकी हस्तगत करण्यात आल्या. तसेच त्याला अटकही करण्यात आली. याबाबतची नोंद कऱ्हाड ग्रामीण पोलीस ठाण्यात झाली आहे. हवालदार विकास सपकाळ तपास करीत आहेत.