नागठाणे : विनापरवाना प्रवासी वाहतूक करणाऱ्या ट्रॅव्हल्सवर बोरगाव पोलिसांनी कारवाई केली. या कारवाई दरम्यान दोन्ही ट्रॅव्हल्सवर प्रत्येकी दहा हजारांची दंडात्मक कारवाई करण्यात आली.
याबाबत बोरगाव पोलिसांकडून मिळालेल्या माहितीनुसार, सोमवार, ३१ मे रोजी सकाळी ११.३०च्या सुमारास बोरगाव पोलीस ठाण्याचे सहाय्यक पोलीस निरीक्षक डॉ. सागर वाघ हे काही कर्मचाऱ्यांसोबत पोलीस स्थानकाच्या हद्दीत पेट्रोलिंग करत असताना मौजे अतीत (ता. सातारा) गावच्या हद्दीतील माजगाव फाट्यावरील हॉटेल राजमुद्रासमोर तहसीलदार नावाची ट्रॅव्हल्स (एमएच ०९ सीव्ही १८९९) तसेच शेफाली नावाची ट्रॅव्हल्स (एमएच ०९ सीव्ही ७८६) अशा दोन ट्रॅव्हल्स उभ्या असलेल्या दिसल्या. तसेच त्यातून काही प्रवासी खाली उतरून हॉटेलमधून जेवणाचे पार्सल घेत असल्याचे निदर्शनास आले. यावेळी कोरोनाच्या पार्श्वभूमीवर जिल्हाधिकाऱ्यांचे आदेशानुसार सर्व हॉटेल आस्थापना बंद ठेवण्यात आल्या असून, अत्यावश्यक कारणाशिवाय वाहतुकीस जिल्हाबंदी असतानाही या दोन्ही ट्रॅव्हल्समधून साधारण ३० ते ४० प्रवासी हे कोल्हापूर ते मुंबई तसेच मुंबई ते कोल्हापूर असा प्रवास करत होते. त्यांच्याकडे ई-पास तसेच कोविड चाचणी अहवालाची मागणी केली असता, त्यांच्याकडे कोणतीही कागदपत्रे मिळूली नाहीत. त्यानंतर ट्रॅव्हल्स चालकांकडे अहवालाची तसेच प्रवासी वाहतुकीच्या परवानगीची कागदपत्र मागितली असता, त्यांच्याकडेही कोणतीही कागदपत्रे नव्हती. त्यामुळे जिल्हाधिकाऱ्यांच्या आदेशाचे उल्लंघन केल्याप्रकरणी तहसीलदार ट्रॅव्हल्सवरील चालक अजित ज्ञानदेव कांबळे (रा. इंदिरानगर, सातारा) व शेफाली ट्रॅव्हल्सचा चालक किशोर गजानन ढमगणे (रा. इचलकरंजी, जि. कोल्हापूर) यांच्यावर प्रत्येकी दहा हजार रुपयांप्रमाणे दंडात्मक कारवाई करण्यात आली. ही कारवाई पोलीस अधीक्षक अजयकुमार बन्सल, अतिरिक्त पोलीस अधीक्षक धीरज पाटील, सहाय्यक पोलीस अधीक्षक आंचल दलाल यांच्या मार्गदर्शनाखाली डॉ. सागर वाघ तसेच हवालदार धनंजय जाधव, विशाल जाधव, विजय साळुंखे यांनी केली.