देवगड : गेले दोन दिवस देवगड समुद्र किनार्‍यावर भरतीच्या लाटांबरोबर काळसर चिकट द्रवाचा थर समुद्र किनार्‍यावर येत आहे. काळ्या रंगाच्या चिकटसर द्रवामुळे समुद्रकिनार्‍यावरील सोनेरी वाळू काळी बनली आहे. हा डांबरसदृश चिकट द्रव कसला आहे, याचा अजून उलगडा झालेला नाही. या द्रवामुळे समुद्रकिनारा दूषित झाला असून पर्यटकांनी किनार्‍याकडे पाठ वळविली आहे. वैशाख अमावास्येची मोठी भरती व ओहोटी याबरोबर हा टाकाऊ पदार्थ किनार्‍याकडे फेकला गेला आहे. मच्छिमारी बोटी खोल समुद्रात मासेमारी करताना कित्येकवेळा टाकाऊ पदार्थ व डांबरसदृश वंगण समुद्रात सोडतात. ते खडकांना तळाशी जाऊन चिकटून राहते. मात्र, प्रवाह बदलल्यामुळे किंवा तापमानातील फरकामुळे हे खडकांपासून वेगळे होते व प्रवाहाच्या जोराबरोबर समुद्रकिनारी येऊन थडकते. प्रत्यक्ष जवळून बघितल्यावर हा चिकट काळा थर डांबरसदृश दिसतो. मात्र, तो वाळूला चिकटल्यामुळे समुद्रकिनार्‍याचे सौंदर्य पूर्णपणे नाहीसे झालेले दिसून येत आहे. त्याचबरोबर हा चिकट द्रव अन्य टाकाऊ वस्तूंनाही एकत्र करून किनार्‍यावर आणून टाकत असल्यामुळे किनारा प्रदूषित झालेला आहे. या परिस्थितीत एरव्ही किनार्‍यावर समुद्र सफरीचा आनंद घेणारे पर्यटक गायब झालेले दिसून येत असून संध्याकाळी ५ ते ६ च्या दरम्यानही किनारा निर्मनुष्य दिसत होता. अशाप्रकारे पर्यटकांनी देवगड पुळणीकडे पाठ फिरविलेली दिसून येत आहे. हा काळा चिकट पदार्थ अशाच प्रकारे येत राहिल्यास पिण्याच्या पाण्याच्या विहिरीसुद्धा प्रदूषित होतील, अशी भीती समुद्रकिनारी राहणार्‍या ग्रामस्थांनी व्यक्त केली आहे. याबाबत जिल्हा परिषद अथवा आरोग्य खात्याच्या माध्यमातून त्वरित कारवाई व्हावी, अशी मागणीही जोर धरू लागली आहे. (प्रतिनिधी)
देवगड समुद्रकिनार्‍यावर डांबरसदृश थर
By admin | Published: May 28, 2014 1:17 AM