डंपरची धडक ; एक ठार

महामार्गावर ओसरगाव येथील अपघात : एक गंभीर जखमी

कणकवली : महामार्गावर ओसरगांव बोर्डवे फाट्यानजीक डंपरच्या धडकेत बळीराम चव्हाण (वय ३६, रा. ओसरगांव, सडा) हा दुचाकीस्वार जागीच ठार झाला. तर एक गंभीर जखमी झाला. डंपरचालकाने ठोकर दिल्यानंतर पळ काढला. गंभीर जखमीला ओरोस येथे जिल्हा रूग्णालयात दाखल करण्यात आले आहे. हा अपघात रविवारी सायंकाळी ७.१५ वाजण्याच्या सुमारास घडला. याबाबत वृत्त असे की, चिरेखाणीवर काम करणारा बळीराम चव्हाण हा कुमार गणू चव्हाण (वय २२, रा. ओसरगांव, सडा) याच्यासोबत दुचाकीवरून कणकवलीहून घराकडे जात होता. बोर्डवे फाट्यानजीक समोरून येणाऱ्या डंपरची दुचाकीला धडक बसली. या धडकेने दुचाकी रस्त्याच्या कडेला उडाली. तर बळीराम चव्हाण हा जागीच ठार झाला. कुमार चव्हाण हा गंभीर जखमी झाला. डंपरच्या धडकेने दुचाकीचा चेंदामेंदा झाला होता. काही वेळाने घटनास्थळी दाखल झालेल्या ‘१०८’ रूग्णवाहिकेने जखमी कुमार चव्हाण याला ओरोस येथे जिल्हा रूग्णालयात दाखल करण्यात आले. अपघात घडल्यानंतर पोलीस तासाभरानंतर घटनास्थळावर दाखल झाले. तोपर्यंत मृतदेह घटनास्थळी पडून होता. अपघातातील मृत आणि जखमी दोघेही मूळ कर्नाटकमधील आहेत. ओसरगांव येथील चिरेखाणीवर कामावर होते. (प्रतिनिधी) दुचाकीचा चेंदामेंदा ४महामार्गावर ओसरगाव येथे झालेल्या अपघातात डंपरची जोरदार धडक बसल्याने दुचाकीचा चेंदामेंदा झाला होता. या अपघातातील गंभीर जखमीला जिल्हा रूग्णालयात दाखल करण्यात आले.