नवी दिल्ली: सोशल मीडियावर नेहमी काही ना काही अनोख्या गोष्टींची चर्चा होत असते, काही घटनांवर तर विश्वास देखील ठेवणे कठीण असते. सध्या आफ्रिकेतील देश युगांडामधून अशीच एक धक्कादायक घटना समोर आली आहे. युगांडातील एका महिलेने पुन्हा पुन्हा जुळ्या मुलांना जन्म दिला म्हणून तिचा पती फरार झाला आहे. विशेष म्हणजे महिलेने सलग पाचव्यांदा जुळ्या मुलांना जन्म दिलेल्या संतप्त पतीने तिला सोडून देण्याचा निर्णय घेतला. या घटनेवर अनेकांचा विश्वास बसत नाही मात्र ही सत्य घटना असून सोशल मीडियावर याची मोठी चर्चा रंगली आहे.
या महिलेचे नाव नलोंगो ग्लोरिया असून तिने अलीकडेच दोन जुळ्या मुलांना जन्म दिला आहे. तिला पुन्हा एकदा जुळी मुलं झाल्याचे पतीला कळताच तो घर सोडून फरार झाला आहे. महिलेचा पती कुठं गेला आहे याची महिलेसह कोणालाच कल्पना नाही. एका मुलाखतीमध्ये याबाबतीत नलोंगा या महिलेने माहिती दिली. जेव्हा ती तिसऱ्यांदा प्रेग्नेंट होती तेव्हाच तिच्या पतीने सांगितले होते की आता खूप झालं आहे, त्यामुळे तू घर सोडून कुठेतरी जा. कारण तिच्या पतीचे म्हणणे आहे की पुन्हा पुन्हा जुळ्या मुलांना जन्म देणं म्हणजे असामान्य आहे.
पती झाला फरार
या धक्कादायक घटनेमुळे संबंधित महिला खूप त्रस्त असून सर्वकाही देवावर अवलंबून असल्याचं म्हणत आहे. मी १० मुलांना जन्म दिला असला तरी मला याचा अजिबात पश्चाताप होत नाही, जरी आपल्या पतीला एवढी मुलं आवडत नसली तरी असं महिलेने स्पष्ट केलं. पण मी माझ्या मुलांशिवाय कुठेही जाऊ शकत नाही मात्र माझी मुलं आता कुठं आहेत हे मला माहित नाही. अशा स्थितीत घरमालकाने मला घर रिकामे करण्यास सांगितले असल्याचे महिलेने अधिक सांगितले. त्यामुळे या महिलेसमोर या लहानग्यांच्या संगोपनाचा मोठा प्रश्न निर्माण झाला आहे. सध्या या अनोख्या घटनेची सर्वत्र चर्चा रंगली आहे.