Video - मेडिकल ऑफिसरने पतीसोबत सरकारी रुग्णालयातच DJ वर धरला ठेका; रुग्णांना झाला त्रास
By ऑनलाइन लोकमत | Published: January 31, 2022 10:14 AM2022-01-31T10:14:48+5:302022-01-31T10:24:20+5:30
Block Medical Officer Joya Khan : रुग्णालयात रुग्ण आणि गर्भवती महिला उपचारासाठी दाखल असतानाच मेडिकल ऑफिसर आपल्या पतीसोबत डीजेवर (DJ) थिरकत असल्याचं पाहायला मिळत आहे.
Video - मेडिकल ऑफिसरने पतीसोबत सरकारी रुग्णालयातच DJ वर धरला ठेका; रुग्णांना झाला त्रास
Next नवी दिल्ली - मध्य प्रदेशच्या जबलपूर जिल्ह्यातील शहपुरा येथील सरकारी रुग्णालयातील एक धक्कादायक व्हिडीओ सध्या जोरदार व्हायरल होत आहे. यामध्ये रुग्णालयात रुग्ण आणि गर्भवती महिला उपचारासाठी दाखल असतानाच मेडिकल ऑफिसर आपल्या पतीसोबत डीजेवर (DJ) थिरकत असल्याचं पाहायला मिळत आहे. जबलपूर जिल्ह्यातील ब्लॉक मेडिकल ऑफिसर (BMO) झोया खान यांनी आपले पती इमरान खानसोबत कटरिना कैफ आणि सलमान खानच्या भारत या चित्रपटातील एका गाण्यावर जबरदस्त ठेका धरला. मात्र या घटनेनंतर आता अनेकांनी टीकेची झोड उठवली आहे.
रुग्णालयात पेशंट दाखल असताना असं कसं घडू शकतं असं म्हणत अनेकांनी संताप व्यक्त केला आहे. तसेच जबाबदारीच्या पदावरील व्यक्ती असं वर्तन कसं काय करू शकतात, असा सवाल केला जात आहे. मिळालेल्या माहितीनुसार, जबलपूर जिल्ह्यातील शाहपुरा ब्लॉक परिसरातील शासकीय रुग्णालयात हा प्रकार घडल्याचं समोर येत आहे. ब्लॉक मेडिकल ऑफिसर झोया खान आणि तिचा पती इमरान खान एका हिंदी सिनेमातील गाण्यावर डान्स करत असल्याचं या व्हिडिओत पाहायला मिळतं.
कैटरीना के गाने पर पति संग सरकारी अस्पताल में जमकर थिरकी BMO मैडम @vikassingh218@News18MP@NikhilEditor@Manish4all@prajapatilalit@sharadjmi@rajeshkshitij@SYadavJabalpurpic.twitter.com/mZrQmjcQ6L
— PRATEEK MOHAN AWASTHI (@prateek2663444) January 30, 2022
रुग्णालय परिसरातच डीजे लावण्यात आला असून त्यावर मोठ्यामोठ्याने गाणी सुरू होती आणि मेडिकल ऑफिसर या पतीसोबत नाचण्यात दंग होत्या. रुग्णालयातील सर्व स्टाफसाठी झोया खान यांनी पार्टीचं आयोजन केल्याचं सांगण्यात येत आहे. प्रजासत्ताक दिनी सर्व स्टाफसाठी ही पार्टी ठेवण्यात आली होती. त्यावेळी रुग्णालयातील सर्व पदाधिकारीही उपस्थित होते. मोठमोठ्या आवाजातील डीजेच्या तालावर थिरकताना रुग्णालयात रुग्णही दाखल आहेत, ही बाब सगळेच जण विसरून गेल्याचं दिसत आहे.
मेडिकल ऑफिसर झोया खान यांच्या पतीची रुग्णालयाजवळच पॅथोलॉजी लॅब आहे. त्याचं नियमित रुग्णालयामध्ये येणं-जाणं असतं. रुग्णालयाच्या स्टाफसोबत झोया खाननं आपल्या पतीलाही या पार्टीसाठी निमंत्रित केलं होतं. या घटनेचा व्हिडीओ व्हायरल झाल्यानंतर वरिष्ठ अधिकाऱ्यांकडून चौकशीचे आदेश देण्यात आले आहेत. नागरिकांकडून या व्हिडिओवर टीका होत असून अशा बेजबाबदार अधिकाऱ्यांना कडक शिक्षा व्हावी, अशी मागणी केली जात आहे. अधिकाऱ्यांनी याचा तपास करून योग्य ती कारवाई केली जाईल असं म्हटलं आहे. एका हिंदी वेबसाईटने याबाबतचे वृत्त दिले आहे.