आप्पासाहेब पाटील, सोलापूर : मराठा समाजाच्या आरक्षणासंदर्भातील मागण्यासाठी आंदोलन करणाऱ्या आंदोलकांवर पोलिसांनी लाठीमार केला. या घटनेचा निषेध म्हणून सोलापुरातील मराठा समाजाने ठिकठिकाणी आंदोलन करण्यास सुरुवात केली आहे. शनिवारी सकाळी सोलापूर- पुणे राष्ट्रीय महामार्गावर समाज बांधवांनी रस्ता रोको आंदोलन करत सरकारचा निषेध केला.
अंबड जालना येथील मराठा समाजातील महिला, लहान मुला- मुली यांच्यावरील झालेल्या भ्याड हल्ल्याबाबत व सरकारच्या लाठी चार्ज विरोधात आंदोलन करण्यात आले. याचवेळी आंदोलनकर्त्यांनी शिंदे- फडवणीस- पवार सरकारचा निषेध केला. दरम्यान, अचानक झालेल्या या आंदोलनामुळे सोलापूर पुणे राष्ट्रीय महामार्गावर वाहतूक कोंडी निर्माण झाली आहे. कोणताही अनुचित प्रकार घडू नये यासाठी सोलापूर तालुका पोलीस स्टेशनचे पोलीस अधिकऱ्यांनी मोठा पोलीस बंदोबस्त तैनात केला आहे.