टेंभुर्णी : शहरात करमाळा रोडवरील विठ्ठल ॲग्रो कृषी सेवा केंद्राच्या छतावरील पत्रा उचकटून चोरट्यांनी दुकानातील रोख रक्कम व १६ हजार रुपयांची कृषी औषधे असा एकूण १९ हजारांचा ऐवज चाेरट्यांनी पळविला.
सोमवारी मध्यरात्री दीड वाजण्याच्या सुमारास ही घटना घडली.
दुकान मालक गोविंद जगताप (रा.शिराळ, टें) हे सोमवारी रात्री आठ वाजता नेहमीप्रमाणे दुकान बंद करून घरी गेले. मंगळवारी सकाळी ९ वाजता त्यांनी दुकान उघडले असता त्यांना छतावरील पत्रा उचकटलेला दिसून आला. गल्ल्याचे लॉक तोडून दोन हजार ८६० रुपये रोख रक्कम आणि कृषी औषधे असा एकूण १९ हजार रुपयांचा माल चोरट्याने चोरून नेल्याचे निदर्शनास आले. याप्रकरणी जगताप यांनी टेंभुर्णी पोलीस ठाण्यात फिर्याद दिली. पोलीस हेडकॉन्स्टेबल राजेंद्र ठोंबरे, पोलीस हेडकॉन्स्टेबल शेख, विजय डोंगरे यांनी घटनास्थळी धाव घेतली.
याबाबत गोविंद जगताप यांनी टेंभुर्णी पोलीस ठाण्यात खबर दिली आहे.
---
चोरटा सीसीटीव्हीमध्ये कैद
चोरी करण्यासाठी दुकानात उतरलेल्या तरुणाचा चेहरा सीसीटीव्ही फुटेजमध्ये कैद झाला आहे. या आधारावर तपास कार्याला पोलिसांनी सुरुवात केली आहे. वाढत्या चोरीच्या घटनेने व्यापाऱ्यांमध्ये भीतीचे वातावरण पसरले आहे.