पोलीस पाटील शाहीर दत्तात्रय जाधवर यांची प्रकृती चिंताजनक आहे तर प्रवीण रामचंद्र सोनवणे यांना गंभीर दुखापत झाली आहे. (दोघे धोत्रे ता. बार्शी) यात सुनील ऊर्फ सोन्या अंकुश गुरव धोत्रे याला संशयित आरोपी अटक केली आहे.
पोलीस सूत्रांनुसार फिर्यादी प्रवीण रामचंद्र सोनवणे (वय २५, धोत्रे) ८ सप्टेंबरला रात्री नऊ वाजण्याच्या सुमारास त्याचे बार्शीहून धोत्रे येथे आला. जेवण आटोपून मारुती मंदिराजवळ बसला होता. गावातला सुनील ऊर्फ सोन्या अंकुश गुरव हा त्याच्या दुचाकीवरून कुसळंब रोडने येऊन तिथून शिवाजीनगर बसने निघून गेला. त्यानंतर पोलीस पाटील शाहीर दत्तात्रय जाधवर व त्याचा मित्र मयूर लांडे हे दोघे दुचाकीवरून आले. त्यांनी फिर्यादीला सुनीलबद्दल विचारले असता तो शिवाजीनगर वस्तीकडे गेल्याचे सांगितले. पोलीस पाटलांसमवेत तोही असे तिघे दुचाकीवरून शिवाजीनगरकडे गेले. मधुकर लांडे यांच्या वीटभट्टीजवळ जाताच समोरून सुनील ऊर्फ सोन्या अंकुश गुरव त्यांना दिसला. त्याला गावात आरडाओरडा करून शिवीगाळ करू नकोस नाहीतर मी पोलीस स्टेशनला फोन करतो, असे समजावून सांगत असताना सोन्याने पाटलांना शिवीगाळ करून केली. फिर्यादी प्रवीण सोनवणे व पोलीस पाटील शाहीर जाधवर यांच्यावर जीवघेणा हल्ला केला. पाटील जखमी अवस्थेत गावाच्या दिशेने पळाले. मयूर लांडे याने प्रवीणला उचलून मोटारसायकलीवर बसवून मधुकर लांडे यांच्या वस्तीवर नेले. तेथून प्रवीणला बार्शी येथील जगदाळे मामा हॉस्पिटलमध्ये उपचारासाठी दाखल केले असून पोलीस पाटील शाहीर जाधवर यांची प्रकृती गंभीर असल्याने त्यांना सोलापूर येथे उपचारासाठी पाठविण्यात आलेले आहे. सुनील गुरव याच्याविरुद्ध गुन्हा नोंदला असून, पुढील तपास पोलीस उपनिरीक्षक प्रवीण जाधव हे करत आहेत.