खंडाळीजवळील अपघातातील दोघांचा उपचारादरम्यान मृत्यू

पोलिसांकडून मिळालेल्या माहितीनुसार, सोलापूरहून पुण्याच्या दिशेने कार (क्र.एमएच १५ जीएक्‍स ९३०२) निघाली होती, तर मालट्रक (क्र. केए ५६- २१६३) पुण्याहून सोलापूरच्या दिशेने येत होता. दरम्यान, अंकुश वसंत चव्हाण हे दुचाकीने (क्र. एमएच १३ सीव्ही २२७३) खंडाळी फाट्यावरून गावाकडे वळताना भरधाव कारने त्यांना जोराची धडक दिली. त्यानंतर कारने चुकीच्या दिशेने जाऊन पुण्याकडून सोलापूरकडेे निघालेल्या मालट्रकला जोराची धडक दिली. या विचित्र अपघातात कारमधील चार, तर दुचाकीवरील दोघे गंभीर जखमी झाले. मोडनिंब महामार्ग मदत केंद्राच्या पोलिसांनी घटनास्थळी धाव घेत टोल नाक्‍यावरील रुग्णवाहिकेतून जखमींना तातडीने सोलापूरला दाखल केले. उपचारादरम्यान अंकुश वसंत चव्हाण (५५, रा. पापरी, ता. मोहोळ), वंदना पगारे (५२, रा. नाशिक) यांचा मृत्यू झाला. अधिक तपास हवालदार अविनाश शिंदे करीत आहेत.