मुंबई - एचएमडी ग्लोबल कंपनीने मोबाईल वर्ल्ड काँग्रेसमध्ये अनावरण केलेला नोकिया ८ सिरोक्को हा स्मार्टफोन आता भारतीय बाजारपेठेत सादर करण्यात आला आहे. एचएमडी ग्लोबल कंपनीने भारतीय बाजारपेठेवर लक्ष केंद्रीत केल्याचे दिसून येत आहे. काही दिवसांपूर्वीच नोकिया १ लाँच करण्यात आल्यानंतर दिल्ली येथील कार्यक्रमात नोकिया ६ (२०१८), नोकिया ७ प्लस आणि नोकिया ८ सिरोक्को हे मॉडेलचे लाँचींग करण्यात आले आहे. या मालिकेत नोकिया ८ सिरोक्को हे मॉडेल प्रिमीयम या प्रकारातील आहे. याचे मूल्य ४९,९९९ रूपये असून २० एप्रिलपासून फ्लिपकार्ट या शॉपींग पोर्टलवरून याची अगावू नोंदणी करता येणार आहे. ग्राहकांना प्रत्यक्षात हे मॉडेल ३० एप्रिलपासून मिळणार असल्याचे कंपनीने जाहीर केले आहे.
नोकिया ८ सिरोक्कोमध्ये ५.५ इंच आकारमानाचा, पीओएलईडी या प्रकारचा आणि क्युएचडी म्हणजे २५६० बाय १४४० पिक्सल्स क्षमतेचा वक्राकार डिस्प्ले असून यावर कॉर्निंग गोरीला ग्लास ५ चे संरक्षक आवरण प्रदान करण्यात आले आहे. क्वॉलकॉमचा ऑक्टा-कोअर स्नॅपड्रॅगन ८३५ हा अत्यंत गतीमान असा प्रोसेसर यात असेल. याची रॅम ६ जीबी आणि इनबिल्ट स्टोअरेज १२८ जीबी इतके आहे. तथापि, मायक्रो-एसडी कार्डचा सपोर्ट नसल्यामुळे हे स्टोअरेज वाढविण्याची सुविधा यात दिलेली नाही. या स्मार्टफोनच्या मागील बाजूस ड्युअल कॅमेरा सेटअप दिला आहे. यात १२ आणि १३ मेगापिक्सल्सच्या झेईस लेन्सयुक्त कॅमेर्‍यांचा समावेश आहे. यातील एक आरजीबी तर दुसरा मोनोक्रोम या प्रकारातील असेल. याला ड्युअल टोन एलईडी फ्लॅशची सुविधा देण्यात आली आहे. तर सेल्फी आणि व्हिडीओ कॉलींगसाठी यात ८४ अंशाच्या विस्तृत व्ह्यू अँगलयुक्त ५ मेगापिक्सल्सचा कॅमेरा असेल. या मॉडेलमध्ये बोथी मोड देण्यात आला असून याच्या मदतीने फ्रँट व बॅक कॅमेर्‍यांचा एकचदा उपयोग करणे शक्य आहे. यात वायरलेस चार्जींगच्या सपोर्टने युक्त असणारी ३,२६० मिलीअँपिअर क्षमतेची बॅटरी दिलेली आहे. तर हा स्मार्टफोन अँड्रॉइडच्या ओरियो या अद्ययावत आवृत्तीवर चालणारा असेल.
नोकिया ८ सिरोक्को या मॉडेलमध्ये मेटलची बॉडी प्रदान करण्यात आली आहे. याच्या जोडीला हा स्मार्टफोन आयपी६७ मानकावर तयार करण्यात आला आहे. अर्थात हा स्मार्टफोन वॉटरप्रूफ आणि डस्टप्रूफ असून तो कोणत्याही प्रकारच्या वातावरणात वापरणे शक्य आहे.