Bigg Boss Marathi 3,Episodes, 26 Oct : स्नेहामुळे सोनालीला सगळ्यांसमोर घालावं लागलं लोटांगण; दादूस-विशालही झाले हतबल

Bigg Boss Marathi : आतापर्यंत या शोमध्ये अनेक टास्क पार पडले असून प्रत्येक टास्कमध्ये घरातील सदस्यांचं एकमेकांसोबत भांडण झालं आहे.

ठळक मुद्देदादूस आणि विशाल, सोनालीसोबत बोलत असताना स्नेहा त्यांना मध्येच आडवते.

'बिग बॉस मराठी' (Bigg boss marathi) हा शो सुरु होऊन आता बरेच दिवस झाले आहेत. त्यामुळे या घरात नेमक्या कशा स्वरुपाचे टास्क रंगतात याचा अंदाज आता प्रेक्षकांनादेखील येऊ लागला आहे. आतापर्यंत या शोमध्ये अनेक टास्क पार पडले असून प्रत्येक टास्कमध्ये घरातील सदस्यांचं एकमेकांसोबत भांडण झालं आहे. विशेष म्हणजे घरात कायम शांतपणे वावरणारी स्नेहा (sneha wagh) ऐनवेळी बरोबर तिचे रंग दाखवत असते. त्यामुळे तिच्या या स्वभावामुळे घरातील अन्य स्त्रियांसोबत तिचे कायमच वाद होतात. यावेळी स्नेहा आणि सोनालीमध्ये (sonali patil) वाद रंगताना पाहायला मिळणार आहे. 

येत्या आठवड्यात संयमाची ऐशी तैशी हे कार्य पार पडणार आहे. या कार्यात दोन टीम असून एका टीममधील सदस्य नरकात असणार आहेत. तर दुसऱ्या टीमचे लोक स्वर्गात. विशेष म्हणजे नरकातील सदस्य स्वर्गातील सदस्यांना कठीणातील कठीण टास्क देणार आहेत. यामध्येच स्नेहा सोनालीला सगळ्यांसमोर लोटांगण घालून घरातील केर काढायला लावणार आहे. त्यामुळे या कार्यावरुन त्यांच्यात वाद होणार की काय अशी शक्यता निर्माण केली जात आहे.

Bigg Boss Marathi: घरामध्ये होतोय सासूबाईंचा वावर? कोण आहे 'ही' व्यक्ती

स्नेहा नरकामध्ये आहे. तर, सोनाली स्वर्गात आहे. त्यामुळे स्नेहा सोनालीला लोटांगण घालून घरातील केर काढायला लावणार आहे. इतकंच नाही तर यावेळी दादूस आणि विशाल, सोनालीसोबत बोलत असताना स्नेहा त्यांना मध्येच आडवते. आणि, ओ तुम्ही असं मध्ये बोलायचं नाही, असं ठणकावून सांगते.

दरम्यान, या नव्या टास्कमध्ये आता नेमकं काय होणार? घरातील सदस्यांमध्ये पुन्हा वाद होणार का? की, हे कार्य सुरळीतपणे पार पडणार हे पाहणं औत्सुक्याचं आहे.