मुरबाड : मुरबाड तालुक्यातील कोरोना रुग्ण हे प्राथमिक उपचारांनंतर कोविड सेंटरमध्ये दाखल होण्यासाठी बदलापूर, उल्हासनगर, ठाणे तसेच मुंबई या ठिकाणी भटकंती करत आहेत. स्थानिक ठिकाणी असणारे कोविड सेंटर सुरु करण्यात प्रशासनाला अपयश आल्याने आरोग्य प्रशासन रुग्णांची गणना तरी करणार काय, असा सवाल केला जात आहे.
जानेवारीपासून मुरबाडमध्ये कोरोना रुग्णांची संख्या वाढत असताना मागील आठवड्यात धसई येथे मायलेकराचा करुण अंत झाला. मुरबाडमध्ये रुग्णांचे प्रमाण कमी होत नसून किरकोळ उपचारांसाठी नागरिक खासगी रुग्णालयांमध्ये धाव घेत असले तरी ते महागडे उपचार परवडत नसल्याने सरकारी रुग्णालयांत उपचार घेण्यासाठी बदलापूर, उल्हासनगर किंवा ठाणे येथे भटकंती करावी लागते. यामुळे अनेक बाधित रुग्ण हे आजार अंगावर काढत असल्याने कोरोना संक्रमणात मोठ्या प्रमाणात वाढ होत असली तरी मुरबाड तालुक्यातील ग्रामीण रुग्णालयात असणारे कोविड सेंटर सुरू करण्यात आरोग्य प्रशासन चालढकल करीत आहे.
तालुक्यातील म्हसा, धसई, शिवळे सरळगाव, तुळई, शिरोशी, न्याहाडी, किशोर या प्राथमिक आरोग्य केंद्रात तसेच टोकावडे व मुरबाड ग्रामीण रुग्णालयात कोविड प्रतिबंधात्मक लस ही ४५ ते ६० वयाच्या नागरिकांना देण्यास सुरुवात केली आहे. आतापर्यंत सुमारे ४३५८ नागरिकांना लस देण्यात आली आहे. मात्र तालुक्यातील बाधित नागरिकांना स्थानिक ठिकाणी कोविड सेंटर उपलब्ध नसल्यामुळे कोण, कुठे उपचार घेत आहेत याची आकडेवारी आरोग्य विभागाकडे नाही.
...............
मुरबाड ग्रामीण रुग्णालयात कर्मचारी व डाॅक्टर नसल्यामुळे अनेक विभाग बंद आहेत. त्यामुळे दररोज सुमारे तीनशे ते चारशे रुग्णांची ओपीडी आता पन्नासवर आलेली आहे. ग्रामीण रुग्णालयाचे ट्रामा केअर सेंटरमध्ये कोविड सेंटर सुरू होते. परंतु ते बंद करण्यात आले आहे. जिल्हा शल्यचिकित्सक तसेच जिल्हा आरोग्य अधिकारी यांनी पुरेसा कर्मचारी वर्ग तसेच डाॅक्टर उपलब्ध करून दिल्यास तत्काळ कोविड सेंटर सुरू करता येईल. त्यामुळे नागरिकांची गैरसोय दूर होईल.
- डाॅ. संजय वाठोरे, वैद्यकीय अधीक्षक, ग्रामीण रुग्णालय, मुरबाड