ठाणे : भिवंडीतील बोरपाडा भागातील रहिवासी अॅड. राजू खारीक (३९) यांच्या घरात चोरी करणाऱ्या संदीप सदानंद जाधव ऊर्फ पाटा (३०, रा. दुमाडा पाडा, कवाड, भिवंडी) याला अटक केल्याची माहिती वरिष्ठ पोलिस निरीक्षक सुरेश मनोरे यांनी बुधवारी दिली. त्याला पुढील कारवाईसाठी भिवंडी तालुका पोलिस ठाण्याच्या ताब्यात देण्यात आले.
भिवंडीच्या बोरपाडा येथील रहिवासी खारीक यांच्या घराच्या मागील बाजूच्या पडवीतून चोरट्यांनी १७ जानेवारी २०२४ रोजी पहाटे ५ च्या सुमारास आत शिरकाव करून रोकड, मोबाईल तसेच बँकेचे एटीएम, पासबुक आणि चेकबुक असा २८ हजार ६०० रुपयांचा मुद्देमाल चोरून नेला होता.
याप्रकरणी भिवंडी तालुका पोलिस ठाण्यात चोरीचा गुन्हा दाखल झाला होता. याच चोरीचा समांतर तपास करून स्थानिक गुन्हे शाखेचे वरिष्ठ निरीक्षक सुरेश मनोरे यांच्या मार्गदर्शनाखाली सहायक निरीक्षक भास्कर जाधव, उपनिरीक्षक महेश कदम, हवालदार प्रकाश साईल, संतोष सुर्वे, स्वप्नील बोडके यांच्या पथकाने कोणताही धागादोरा नसताना सीसीटीव्ही फुटेजच्या आधारे आरोपी संदीप जाधव याला ताब्यात घेतले. त्याच्याकडे केलेल्या चौकशीत त्याने या चोरीची कबुली दिली. त्याच्याकडून चोरीतील ऐवज हस्तगत करण्यात येत असल्याचे ठाणे ग्रामीण पोलिसांनी सांगितले.