अखेर ‘त्या’ ताेतया पोलिसांना अटक

सचिन लहानू भालेराव (४९) हे उल्हासनगर- ४ येथील सुभाष टेकडी परिसरात राहत असून एका खासगी कंपनीत काम करतात. २५ मे रोजी सायंकाळी ६.१० वाजता ते अंबरनाथ रेल्वेस्थानकावर उतरून कानसई रस्त्याने घरी जात होते. तेव्हा दोन अनाेळखी इसम मोटारसायकलवरून आले आणि त्यांनी सचिन यांना थांबविले. सचिन यांनी ताेंडावरचा मास्क काढल्याने, तू सरकारी नियम मोडले असून तुझ्यावर पोलीस कारवाई करावी लागेल अशी दमदाटी केली. त्यानंतर त्यांच्या बोटात असलेली २० हजार रुपयांची सोन्याची अंगठी जबरदस्तीने काढून घेतली. त्यानंतर ते फरार झाले होते. याप्रकरणी सचिन यांनी दिलेल्या फिर्यादीनंतर शिवाजीनगर पोलीस ठाण्यात दोघांविराेधात गुन्हा दाखल करण्यात आला होता. दरम्यान, रविवारी गुन्हे प्रकटीकरण पथकातील पोलीस अमलदार पाटील व मुंढे यांना मटका चौकात एक विना नंबरप्लेट असलेली मोटारसायकल दिसली. त्यावर तीन इसम बसले हाेते. पोलिसांनी त्यांचा पाठलाग करून त्यांना ऑर्डनन्स इस्टेट रोड येथे थांबवून विचारणा केली असता त्यांनी उडवाउडवीची उत्तरे दिल्याने त्यांना अंबरनाथ पोलीस ठाण्यात आणण्यात आले. त्यांच्या चाैकशीत २५ मे राेजी शिवाजीनगर पाेलीस ठाणे हद्दीत एकाला लुटल्याचे कबूल केले आहे. त्यांना न्यायालयासमोर हजर केले असता त्यांना पोलीस कोठडी सुनावण्यात आली.