ठाणे - वैफल्यग्रस्त झालेल्या डॉ. पवन साबळे (वय ४६) यांनी ठाण्यातील राहत्या घरी गळफास घेऊन आत्महत्या केल्याची घटना शनिवारी सकाळी घडली. या प्रकरणी चितळसर पोलिस ठाण्यात आकस्मिक मृत्यूची नोंद केली आहे.
मानपाडा येथील हॅप्पी व्हॅली गृहसंकुलात राहणारे डॉ. पवन साबळे परळच्या केईएम रुग्णालयात जन औषध वैद्यकशास्त्र विभागात सहायक प्राध्यापकपदी कार्यरत होते. त्यांना काही वर्षांपासून दारू पिण्याचे व्यसन जडले होते. साबळे यांच्या पत्नी व दोन मुले काही दिवसांपासून त्यांच्यापासून वेगळे राहत होते.
या कौटुंबिक तणावातून ते वैफल्यग्रस्त झाले होते. शनिवारी सकाळी त्यांचा मृतदेह राहत्या घरात गळफास घेतलेल्या अवस्थेत आढळून आला. साबळे यांचा चालक सकाळी घरी आसा त्यावेळी ही घटना उघडकीस आली. त्याने तातडीने पोलिसांना याबाबतची माहिती दिली. घटनास्थळी सुसाईड नोट पोलिसांना मिळाली असून त्यात आपल्या पश्चात सर्व संपत्ती पत्नीच्या नावे करावी, असे डॉ. साबळे यांनी आत्महत्येपूर्वी सुसाईड नोटमध्ये लिहून ठेवल्याचे पोलिसांनी सांगितले.