उत्तर प्रदेशातील पीलीभीतमधून एक धक्कादायक घटना समोर आली आहे. याठिकाणी हुंडा म्हणून 10 लाख रुपये न मिळाल्याने लग्नाला तीन महिने उलटूनही वराने शारीरिक संबंध ठेवले नसल्याचा आरोप आहे. दोन्ही कुटुंबांमध्ये 5 लाख रुपयांचा करार झाला, त्यानंतर वधू-वर हनिमूनसाठी नैनितालला गेले. पण नैनितालमध्येही पती पत्नीपासून दूर राहिल्याचा आरोप आहे. तसेच नैनितालमध्ये काही अश्लील फोटो काढल्याचा आरोप तरुणीने केला आहे. यानंतर त्याने ब्लॅकमेलिंग आणि हुंड्याची मागणी सुरू केल्याचे सांगण्यात येत आहे.
व्यथित झालेल्या पत्नीने पीलीभीत कोतवाली पोलीस ठाण्यात सासू आणि पतीविरुद्ध गुन्हा दाखल केला आणि न्यायाची मागणी केली. नवरा आणि सासू तिच्यावर अत्याचार करून हुंड्याची मागणी करत असल्याचा आरोप वधूने केला आहे. पीडितेचे म्हणणे आहे की, तिचा विवाह 6 फेब्रुवारी 2023 रोजी बदायू पोलीस स्टेशनच्या बिसौली भागातील एका तरुणाशी झाला होता. नातेवाईकांनी क्षमतेनुसार 20 लाख रुपये खर्च केले होते.
"10 लाख रुपये द्या म्हणजे हनिमूनला जाऊ"
15 लाखांचे दागिनेही हुंडा म्हणून देण्यात आले. पण, पतीने लग्नानंतर हनिमून साजरा केला नाही. तसेच लग्नाच्या तीन महिन्यांनंतरही पतीने तिच्याशी शारीरिक संबंध ठेवले नाहीत. 29 मार्च रोजी तिने सासूला या संपूर्ण प्रकरणाची माहिती दिली. मात्र तिने त्याकडे लक्षही दिले नाही. काही दिवसांनी पीडित मुलगी पीलीभीत येथील तिच्या घरी आली आणि तिने सर्व प्रकार आईला सांगितला. यानंतर 22 एप्रिल रोजी पीडितेचा पती तिला घेण्यासाठी आला असता, सासूने सुनेला काही आजार असल्यास सांगा, आम्ही उपचार करून घेऊ, असे सांगितले. यावर नवरा म्हणाला, 10 लाख रुपये द्या म्हणजे हनिमूनला जाऊ.
5 लाख रुपये देऊन हनिमूनला पाठवले
कुटुंबीयांनी पाच लाख रुपये दिले आणि 7 मे रोजी दोघेही हनिमूनला नैनितालला गेले. वधूने सांगितले की ती तिच्या पतीसोबत एकाच खोलीत राहिली. मात्र, पतीने तिचे अश्लील फोटो आणि व्हिडrओ बनवले. उरलेले 5 लाख रुपये घेऊन ये म्हणाला. न दिल्यास हा फोटो आणि व्हिडीओ व्हायरल करेन अशी धमकी दिली. महिला माहेरी आली आणि तिने सर्व प्रकार तिच्या कुटुंबीयांना सांगितला. यानंतर पीडितेने पोलीस ठाण्यात सासू आणि पतीविरुद्ध तक्रार दाखल केली. पोलीस अधिक तपास करत आहेत. एका हिंदी वेबसाईटने याबाबतचे वृत्त दिले आहे.