पुन्हा एका चिमुकलीवर अतिप्रसंगाचा प्रयत्न

जिल्ह्यात लहान आणि अल्पवयीन मुलीवर बलात्काराचे प्रकार दिवसागणिक वाढत आहे. मात्र यावर पोलिसांचा कुठलाही वचक राहिलेला नाही.

वर्धा : जिल्ह्यात लहान आणि अल्पवयीन मुलीवर बलात्काराचे प्रकार दिवसागणिक वाढत आहे. मात्र यावर पोलिसांचा कुठलाही वचक राहिलेला नाही. गुरुवारी एका युवकाने एका आठ वर्षीय चिमुकलीला पळवून तिच्यावर अतिप्रसंग करण्याचा प्रयत्न केल्याची घटना उघडकीस आल्याने खळबळ उडाली. ही घटना गुरुवारी दुपारी १ वाजताच्या सुमारास लहानुजीनगर येथे उघड झाली. या प्रकरणी शेख तौसीब शेख शकील (१८) याच्याविरूद्ध शहर ठाण्यात तक्रार दाखल करण्यात आली आहे. पोलीस सूत्रांनी दिलेल्या माहितीनुसार, लहानुजीनगर परिसरात आठ वर्षीय चिमुकली तिच्या मैत्रिणीसह खेळत होती. अशातच शेख तौसीब शेख शकील हा तिथे आला. त्याने सदर चिमुकलीला मला तुझ्या वडिलाने पाठविले, तुला फुले तोडून देतो, असे म्हणत अग्रग्रामी हायस्कूल मागील परिसरातील मोकळ्या जागेवर नेत तिच्यावर अतिप्रसंग करण्याचा प्रयत्न केला. मुलगी दिसत आली नाही म्हणून तिच्या कुटुुंबीयांनी शोध घेण्याचा प्रयत्न केला; मात्र तिचा शोध लागत नव्हता. अशात ती ज्या मुलींसोबत खेळत होती, त्यातील एक मुलगी घरी परत आली. यावेळी तिने एका काकाने तिला नेल्याचे सांगितले. यावरून तिचे आई-वडिल व नातेवाईक सदर परिसरात जात असताना सदर युवक चिमुकलीला परत घेऊन येत होता. तो तिला सोडून पसार होण्याच्या बेतात असताना त्याला पकडून पोलिसांच्या स्वाधीन केले. या प्रकरणी चिमुकलीच्या वडिलाच्या फिर्यादीवरुन शहर पोलिसांनी शेख तौसीब शेख शकील याच्याविरुद्ध गुन्हा दाखल करण्याची प्रक्रीया सुरू केली. वृत्त लिहिस्तोवर गुन्हा दाखल करण्यात आला नव्हता.(प्रतिनिधी)