मनोर : मुंबई - अहमदाबाद महामार्गावरील टेन गावच्या हद्दीत मुंबई दिशेने जाणाऱ्या एका गाडीवर अज्ञात व्यक्तीने गोळीबार केला. मात्र, चालकाने गाडी पुढे नेल्याने मागच्या काचेवर ही गोळी लागली. सुदैवाने तो बचावला. याप्रकरणी मनोर पोलीस ठाण्यात गुन्हा दाखल करण्यात आला असून पोलीस अधिक तपास करत आहेत.
पालघर येथील धर्मेश गांधी आणि विकासक पाटील यांच्याकडे सदनिका घेण्यासाठी मुंबईचे सुजीत पाटकर गेले होते. तेथून ते आपल्या घरी परतत असताना मुंबई अहमदाबाद-महामार्गावर टेन गावाच्या हद्दीत वेगास हॉटेलसमोर मागून दुचाकी घेऊन आलेल्या एका व्यक्तीने त्यांना थांबवायचा प्रयत्न केला.
मात्र, पाटकर यांनी आपली गाडी न थांबवता पुढे नेली. त्याचवेळी त्या व्यक्तीने आपल्याजवळील रिव्हॉल्वरमधून गोळी झाडली. सुदैवाने ती गोळी दरवाज्याच्या काचेवर लागल्याने ते बचावले.सुजीत पाटकर यांच्याबाबत मुंबईतही असे प्रकार घडल्याची माहिती उपविभागीय पोलीस अधिकारी विकास नाईक यांनी दिली.