१४८ शिक्षकांची आज पदस्थापना!

आंतरजिल्हा बदली प्रकरण : समुपदेशन पद्धतीने मिळणार जिल्हा परिषद शाळा

लोकमत न्यूज नेटवर्कवाशिम: आंतरजिल्हा बदली प्रक्रियेतून वाशिम जिल्ह्यात बदलून आलेल्या १४७ प्राथमिक शिक्षकांना समुपदेशन पद्धतीने १७ जुलै रोजी जिल्हा परिषद शाळांतील रिक्त पदांवर सामावून घेतले जाणार आहे.गत काही वर्षांपासून जिल्हा परिषदेच्या शिक्षकांची आंतरजिल्हा बदली प्रक्रिया बंद असल्याने शिक्षकांना विविध गैरसोयींना सामोरे जावे लागले. आंतरजिल्हा बदली प्रकरण निकाली काढण्याची मागणी विविध शिक्षक संघटनांकडून वारंवार झाली. शासनस्तरावर या मागणीचा सकारात्मक विचार झाल्याने आंतरजिल्हा बदलीप्रकरणी शासनाने २४ एप्रिल २०१७ अन्वये सुधारित धोरण निश्चित केले. त्यानुसार इच्छुक शिक्षकांकडून संबंधित पंचायत समितीच्या गटशिक्षणाधिकारी कार्यालयात आॅनलाइन पद्धतीने अर्ज मागविले होते. ही प्रक्रिया मे व जून महिन्यात पार पडली. त्यानंतर शिक्षकांच्या आंतरजिल्हा बदली प्रक्रिया पूर्ण झाली. या प्रक्रियेत वाशिम जिल्ह्यात एकूण २१३ शिक्षक बदलीस पात्र ठरले आहेत, तर वाशिम जिल्ह्यातील एकूण ७४ शिक्षक अन्य जिल्ह्यात बदलून गेले. २१३ पैकी १४८ शिक्षक जिल्हा परिषदेच्या शिक्षण विभागात रुजू झाले आहेत. या शिक्षकांना जिल्हा परिषद शाळांमधील रिक्त जागांवर पदस्थापना दिली जाणार आहे. ही प्रक्रिया पारदर्शकतेने राबविण्याच्या दृष्टिकोनातून १७ जुलै रोजी जिल्हा परिषदेच्या स्व. वसंतराव नाईक सभागृहात समुपदेशन पद्धतीने रिक्त जागांवर नियुक्ती दिली जाणार आहे. आॅनलाइन पद्धतीने आंतरजिल्हा बदली प्रक्रिया राबविण्यात आली. परजिल्ह्यातून वाशिम जिल्ह्यात बदलीवर येणारे २१३ शिक्षक बदलीस पात्र ठरले आहेत. यापैकी १४८ शिक्षक शिक्षण विभागात रुजू झाले. या शिक्षकांना शाळेतील रिक्त जागांवर पदस्थापना देण्यासाठी १७ जुलै रोजी जिल्हा परिषदेच्या सभागृहात समुपदेशन पद्धतीने प्रक्रिया राबविली जाणार आहे.- अंबादास मानकर, शिक्षणाधिकारी (प्राथमिक) वाशिम.