हातभट्टी अड्डयांवर धाड; १.९२ लाख रुपयांचा मुद्देमाल जप्त!

मोहगव्हाण येथील गावठी हातभट्टी अड्डयांवर स्थानिक गुन्हे शाखेच्या पथकाने ८ एप्रिल रोजी धाड; एका आरोपीस अटक.

वाशिम : अनसिंग पोलिस ठाण्यांतर्गत येत असलेल्या मोहगव्हाण येथील गावठी हातभट्टी अड्डयांवर स्थानिक गुन्हे शाखेच्या पथकाने ८ एप्रिल रोजी धाड टाकून १ लाख ९२ हजार ६२० रुपयांचा मुद्देमाल जप्त केला. याप्रकरणी एका आरोपीस अटक करण्यात आली आहे.स्थानिक गुन्हे शाखेच्या पथकाने ग्राम मोहगव्हाण येथे उस्मान हुसेन नंदावाले, तुकड्या खैरु औरंगाबादी, नजीर रशिद नंदावाले, जैमीन पिरु नंदावाले यांच्या गावठी हातभट्टी दारू अड्डयांवर शनिवारी धाड टाकली. सडवा मोहा ३०४५ लिटर व ५०१ लिटर गावठी हातभट्टी दारु (किंमत १ लाख ९२ हजार ६२०) रुपये जप्त करण्यात आली. कारवाईदरम्यान अकबर शब्बीर औरंगाबादी या आरोपीस अटक करण्यात आली असून इतर आरोपी फरार होण्यात यशस्वी झाले. संबंधित सर्व आरोपींविरुध्द अनसिंग पोलिस स्टेशनमध्ये मुंबई प्रोव्हिशन अ‍ॅक्ट कलम ६५ (फ) प्रमाणे कारवाई करण्यात आली. पोलिस अधिक्षक प्रशांत होळकर यांच्या मार्गदर्शनाखाली पोलिस निरीक्षक एच.व्ही.गिरमे, पो.हे.कॉ. नारायण जाधव, संजय नंदकुले, लक्ष्मण कोल्हे, प्रदीप चव्हाण, प्रकाश सरनाईक, बालाजी बर्वे, आत्माराम राठोड यांनी कारवाईत सहभाग नोंदविला.