राजूरा (जि. वाशिम), दि. १३- येथील शेतशिवारात सोयाबीन पिकाची सोंगणी करण्यासाठी गेलेल्या मजुरांवर आगी मोहळाच्या मधमाशांनी अचानक हल्ला चढविला. यामध्ये चारजण गंभीर जखमी झाले. ही घटना १३ ऑक्टोबर रोजी सकाळी ९ वाजतादरम्यान येथे घडली. राजूरा परिसरात सध्या सोयाबीन काढणीचा हंगाम जोमात सुरू आहे. सुगीचे हेच दिवस असल्याने मजुरवर्ग दिवस उजाडण्यापुर्वीच सोयाबीन सोंगनीच्या कामासाठी शेताकडे रवाना होत आहेत. आज सकाळी सहा वाजतादरम्यान १४ मजूर सोयाबीन सोंगणीचे काम करत असतानाच मधमाशांनी अचानकपणे मजुरांवर हल्ला चढविला. या हल्ल्यात नारायण वामन हिवराळे, नंदाबाई नारायण हिवराळे, धर्मा सयाजी हिवराळे व प्रविण हिवराळे यांना मधमाशांनी चावा घेतला. जखमी चारही जणांवर मालेगाव येथील खासगी दवाखान्यात उपचार सुरू आहेत. मधमाशांच्या या हल्ल्यामुळे मजूरवर्गात दहशत निर्माण झाली आहे.
मधमाशांच्या हल्ल्यात चार मजुर जखमी
By admin | Published: October 14, 2016 2:35 AM