हाणामारीत एक जण गंभीर जखमी

शेलगाव येथे दोन गटात वाद ; २७ जणांविरूद्ध गुन्हा.

शिरपूर जैन (जि. वाशिम) : येथून जवळच असलेल्या शेलगाव बोंदाडे येथे दोन गटात प्लॉटच्या मुद्यावरून हाणामारीची घटना २ डिसेंबरला घडली. या घटनेत एक जण गंभीर तर दोन जण किरकोळ जखमी झाले. पोलिसांनी परस्पर विरोधी तक्रारीवरून एकूण २७ जणांविरुद्ध गुन्हा दाखल करुन ९ जणांना अटक केली. शिरपूर पोलीस स्टेशन अंतर्गत येणार्‍या ग्राम शेलगाव बोंदाडे येथे प्लॉटच्या मुद्यावरून दोन गटात तुंबळ हाणामारी झाली. यामध्ये रामेश्‍वर जगन्नाथ वाझुळकर यांच्या फिर्यादीनुसार केशव नवृत्ती वाझुळकर व त्यांच्या १४ सा थीदारांनी फिर्यादीच्या भावास लाठीकाठीने मारहाण करुन जखमी केले तर दुसर्‍या गटातील फिर्यादीच्या वडिलास विरुद्ध गटातील १२ जणांनी घरात घुसून लोखंडी पाइप व लाठय़ाकाठय़ांनी मारहाण केली असल्याची तक्रार दिली. या घटनेत गजानन सूर्यभान वाझुळकर हे गंभीर जखमी झाले असून, त्यांना उपचारासाठी अकोला येथील सर्वोपचार रुग्णालयात पाठविण्यात आले. याच घटनेत इतर दोन जण जखमी झाले. याप्रकरणी दोन्ही गटाच्या २७ जणांविरुद्ध पोलिसांनी विविध कलमान्वये गुन्हे दाखल केले असून, ९ जणांना अटक करण्यात आली. सदर प्रकरणाचा तपास नव्यानेच रुजू झालेले पोलीस निरीक्षक गवळी यांच्या मार्गदर्शनात पोलीस उपनिरीक्षक कमलेश खंडारे, असदखा पठाण हे करीत आहेत.