जिल्ह्यात कोरोना रुग्णांची संख्या कमी होत असल्याने जिल्हावासीयांना दिलासा मिळत आहे. नव्याने कोरोना रुग्ण आढळून येण्याचे प्रमाण अतिशय घटले आहे. गुरुवारी नव्याने ३ रुग्ण आढळून आले. मालेगाव व रिसोड तालुक्याचा अपवाद वगळता उर्वरित चार तालुक्यांत एकही रुग्ण आढळून आला नाही. आतापर्यंत जिल्ह्यात ४१,६९६ रुग्ण आढळून आले आहेत. यापैकी ४१,०४१ रुग्णांनी कोरोनावर मात केली तर आतापर्यंत ६३७ जणांचा मृत्यू झाला. कोरोनाची दुसरी लाट ओसरत असली तरी तिसऱ्या लाटेची शक्यता वर्तविण्यात येत असल्याने नागरिकांनी काळजी घ्यावी, असे आवाहन जिल्हा प्रशासन व आरोग्य विभागाने केले आहे.
००००
चार तालुके निरंक
गुरुवारच्या अहवालानुसार मंगरूळपीर, मानोरा, वाशिम व कारंजा या चार तालुक्यांत तसेच रिसोड व मालेगाव शहरात एकही रुग्ण आढळून आला नाही. जिल्ह्यातील एकाही प्रमुख शहरात कोरोना रुग्ण आढळून आला नाही.