पुसद : पुसद अर्बन बँकेचे अध्यक्ष शरद मैंद यांच्या वाहनाला यवतमाळ-पुसद मार्गावरील लाख गावानजीक अपघात झाला. ही घटना शुक्रवारी दुपारी ३.३० वाजता घडली. शरद मैंद कुटुंबीयांसह नागपूरला गेले होते. शुक्रवारी नागपूर येथून पुसदकडे ते आपल्या होंडा एम्परर (एमएच ३१ ईडब्ल्यु ७२९९) या वाहनाने निघाले होते. यावेळी ते स्वत:च कार चालवीत होते. दरम्यान, दारव्हा ते दिग्रस मार्गावरील लाख गावाजवळ त्यांचे गाडीवरील नियंत्रण सुटले. भरधाव गाडी झाडाला धडकून उलटली. या अपघातात शरद मैंद यांना मुका मार लागला आहे. त्यांची पत्नी शुभदा यांचा पाय फ्रॅक्चर झाला. मुलगा शिवराज याच्या कपाळाला मार लागला तर मुलगी समीक्षा हिलाही दुखापत झाली आहे. मैंद यांचा चालक गजानन राऊत याचा हात फ्रॅक्चर झाला आहे. जखमींवर यवतमाळ येथील खासगी रुग्णालयात उपचार सुरू आहेत. शरद मैंद यांची प्रकृती चांगली असल्याची माहिती आहे. अपघाताची वार्ता कळताच शरद मैंद यांच्या चाहत्यांनी यवतमाळकडे धाव घेतली. (प्रतिनिधी)
शरद मैंद यांच्या वाहनाला अपघात
By admin | Published: May 29, 2016 2:35 AM