केक कापण्याऐवजी त्यांनी एकमेकांवर केले चाकूने वार

बाभूळगाव रोडवरील प्रेमनगरमध्ये हे तीन अल्पवयीन तरुण वाढदिवस साजरा करण्यासाठी शुकवारी रात्री नऊच्या सुमारास जमले होते. वाढदिवसाचा केक कापण्यापूर्वी आणलेल्या खाद्यपदार्थावर ताव मारत हे तिघेही गप्पा मारत होते. अचानक या तिघांत किरकोळ कारणावरुन बाचाबाची सुरु झाली आणि काही समजायच्या आतच एकाने वाढदिवस साजरा करण्यासाठी आलेल्या मित्रावर चाकूने हल्ला चढविला. या घटनेत मित्राच्या दोन्ही हाताच्या बोटावर वार करण्यात आले. आपल्या मित्रावर चाकूने हल्ला होत असल्याने दुसरा मित्र त्याला वाचविण्यासाठी पुढे आला असता, संतापलेल्या पहिल्या मित्राने त्याच्या पायावर चाकूने हल्ला केला. यात तो जखमी झाला. यानंतर जखमी झालेल्या दोन्ही मित्रांनी मिळून हल्ला करणाऱ्या मित्राच्या हातातून चाकू हिसकावून घेत, त्याच चाकूने त्याच्यावर वार केले. यामध्ये त्याच्या पोट आणि हातावर गंभीर जखमा झाल्या आहेत. त्याला यवतमाळ येथे अधिक उपचारासाठी दाखल करण्यात आले आहे. याप्रकरणी कळंब पोलिसांनी परस्परविरोधी तक्रारीवरुन तिघांवरही विविध कलमान्वये गुन्हे दाखल केले. या घटनेचा अधिक तपास ठाणेदार अजित राठोड यांच्या मार्गदर्शनाखाली सुरु आहे.