Video - "मी आणि दादांनी सिनेमा पाहिला, तुम्ही कधी पाहणार?"; TDMसाठी सुप्रिया सुळेंची खास पोस्ट

Supriya Sule And TDM : राष्ट्रवादी काँग्रेसच्या नेत्या सुप्रिया सुळेंनी टीडीएम चित्रपटासाठी एक खास पोस्ट केली आहे.

भाऊराव कऱ्हाडे (Bhaurao Karhade) दिग्दर्शित TDM हा चित्रपट सोशल मीडियावर तुफान चर्चेत येत आहे. काही दिवसांपूर्वीच हा सिनेमा प्रेक्षकांच्या भेटीला आला होता. मात्र, या सिनेमाला शो मिळत नव्हते. त्यामुळे दिग्दर्शकांसह संपूर्ण टीमच्या डोळ्यात अश्रू आले होते. याविषयी त्यांनी त्यांच्या भावनाही व्यक्त केल्या होत्या. लवकरच हा सिनेमा पुन्हा एकदा नव्याने रिलीज होत आहे. त्यामुळे तो पुन्हा एकदा चर्चेत आला आहे. याच दरम्यान राष्ट्रवादी काँग्रेसच्या नेत्या सुप्रिया सुळेंनी टीडीएम चित्रपटासाठी एक खास पोस्ट केली आहे.

आपल्या ट्विटर अकाऊंटवरून सुप्रिया सुळे यांनी एक व्हिडीओ पोस्ट केला आहे. यातून त्यांनी  ‘टीडीएम’ चित्रपट पाहण्याचं प्रेक्षकांना आवाहन केलं आहे. तसेच अजित पवार व सुप्रिया यांनी हा चित्रपट पाहिल्याचं देखील व्हिडीओमध्ये म्हटलं आहे. ऋषी काळे असं या कलाकाराचं नाव असून तो टीडीएम चित्रपटातून मोठ्या पडद्यावर पदार्पण करत आहे. "मी आणि दादांनी हा सिनेमा पाहिलाय, तुम्ही कधी पाहणार? जरूर पाहा" असं सुप्रिया सुळेंनी म्हटलं आहे. 

View this post on Instagram

A post shared by Supriya Sule (@supriyasule)

"आपल्या बारामती लोकसभा मतदारसंघातील इंदापूर तालुक्याचे सुपुत्र आणि विद्या प्रतिष्ठानचे माजी विद्यार्थी ऋषि विलास काळे यांची भेट झाली. ऋषी लवकरच राष्ट्रीय पुरस्कार विजेते दिग्दर्शक भाऊराव कऱ्हाडे यांच्या टि.डी. एम. या चित्रपटातून मोठ्या पडद्यावर पदार्पण करणार आहे. भेटीदरम्यान त्याचा कलाक्षेत्रातील प्रवास जाणून घेऊन त्याचे अभिनंदन केले. त्याला 9 जून रोजी प्रदर्शित होणाऱ्या चित्रपटासाठी शुभेच्छा दिल्या. आपणही सर्वांनी हा चित्रपट नक्की पाहा!" असं सुप्रिया सुळे यांनी आपल्या पोस्टमध्ये म्हटलं आहे. 

बहुचर्चित चित्रपट TDM काही दिवसांपूर्वी रिलीज झाला होता. मात्र शोज न मिळाल्या कारणाने चित्रपट सिनेमागृहातून बाहेर पडला. सिनेमातील कलाकारांवर अक्षरश: थिएटरमध्ये जाऊन रडण्याची वेळ आली. स्क्रीन्सच मिळत नाही म्हणल्यावर भाऊराव कऱ्हाडे नाराज झाले आणि त्यांनी प्रदर्शन थांबवलं. पण आता TDM चा धमाका पुन्हा होणार आहे. TDM सिनेमा पुन्हा संपूर्ण महाराष्ट्रात प्रदर्शित करण्याचा निर्णय भाऊराव कऱ्हाडे यांनी घेतला आहे. 9 जूनपासून सिनेमा पुन्हा रिलीज करत आहोत अशी घोषणा भाऊराव कऱ्हाडे यांनी केली. सोशल मीडियावर ही माहिती देत ते म्हणाले.