आमदार संजय गायकवाड अडचणीत; काँग्रेसने दिल्ली पोलिसात दाखल केली तक्रार

शिवसेना शिंदे गटाचे आमदार संजय गायकवाड यांच्याविरोधात पोलीस ठाण्यात तक्रार दाखल करण्यात आली आहे

MLA Sanjay Gaikwad : शिवसेना शिंदे गटाचे आमदार संजय गायकवाड यांच्याविरोधात पोलीस ठाण्यात तक्रार दाखल करण्यात आली आहे.  काँग्रेस नेते आणि विरोधी पक्षनेते राहुल गांधी यांच्याविरोधात वादग्रस्त वक्तव्य केल्याप्रकरणी संजय गायकवाड यांच्याविरोधात दिल्लीत तक्रार करण्यात आली आहे. दिल्लीतल्या तुघलक रोड पोलीस ठाण्यात काँग्रेसने आमदार संजय गायकवाड यांच्याविरोधात तक्रार दाखल केली आहे. केंद्रीय मंत्री रवनीत बिट्टू यांच्यासह संजय गायकवाड यांच्याविरोधात ही तक्रार दाखल झाली आहे. काँग्रेस नेते अजय माकन यांनी ही तक्रार  दिली.

विरोधी पक्षनेते राहुल गांधी यांनी परदेशात असताना आरक्षणासंदर्भात एक विधान केले होते. त्या वक्तव्यानंतर आमदार संजय गायकवाड यांनी टीका केली होती. राहुल गांधी यांची जीभ छाटणाऱ्याला ११ लाखांचे बक्षीस देणार असल्याचे विधान संजय गायकवाड यांनी केले होते. गायकवाड यांच्या या वक्तव्यानंतर महाविकास आघाडीच्या नेत्यांनी त्यांच्याविरोधात टीका केली होती. त्यानंतर आता काँग्रेसने दिल्लीत आमदार गायकवाड यांच्याविरोधात तक्रार दिली आहे. काँग्रेसचे उपाध्यक्ष अजय माकन यांनी एनडीएच्या चार नेत्यांविरोधात दिल्लीच्या तुघलक रोड पोलीस ठाण्यात तक्रार दाखल केली आहे. यामध्ये आमदार संजय गायकवाड यांच्यासह दोन केंद्रीय मंत्र्यांचाही समावेश आहे.

काय म्हणाले संजय गायकवाड?

बुलढाणा येथील पत्रकार परिषदेत बोलताना आमदार संदय गायकवाड यांनी राहुल गांधी यांच्यावर टीका केली होती. "काँग्रेसचा खरा चेहरा समोर आला आहे. राहुल गांधी यांचं वक्तव्य हा जनतेचा सर्वात मोठा विश्वासघात आहे. राहुल गांधी हे संविधानाचं पुस्तक दाखवून भाजप ते बदलून टाकेल असं खोटं नरेटिव्ह पसरवतात. पण प्रत्यक्षात देशाला ४०० वर्षे मागे नेण्याची काँग्रेसची योजना आहे. मराठा, धनगर आणि ओबीसी सारखे समाज इथं आरक्षणासाठी लढत आहेत, पण ते देण्याऐवजी राहुल गांधी त्यांचे आरक्षणाचे लाभ संपवण्याची भाषा करत आहेत. त्यांची जीभ कापणाऱ्याला मी ११ लाख रुपये बक्षीस देईन," असं आमदार संजय गायकवाड यांनी म्हटलं होतं.

राहुल गांधींच्या जीभेला चटके द्या - खासदार अनिल बोंडे

संजय गायकवाड यांनी केलेल्या वक्तव्यानंतर आता भाजप खासदार अनिल बोंडे यांनीही राहुल गांधींविरोधात टीका केली आहे. "संजय गायकवाड यांनी जीभ छाटण्याची केलेली भाषा योग्य नाहीये. परंतु राहुल गांधी आरक्षणासंदर्भात जे बोलले ते अतिशय भयानक आहे. विदेशात जाऊन वात्रटासारखं कोणी बोलत असेल तर त्यांची ‘जीभ छाटू नये जिभेला चटके मात्र दिले पाहिजे’ अशा लोकांच्या जिभेला चटके देणे आवश्यक आहे," अशी टीका अनिल बोंडे यांनी केली आहे.