"हिंमत असेल तर उन्नावमधून निवडणूक लढवा"; भाजपा नेत्याचं राहुल-प्रियंका गांधींना आव्हान

साक्षी महाराज यांनी आता काँग्रेसवर जोरदार हल्लाबोल केला आहे.

उत्तर प्रदेशातील उन्नावचे खासदार साक्षी महाराज हे नेहमीच त्यांच्या विधानांमुळे चर्चेत असतात. साक्षी महाराज यांनी आता काँग्रेसवर जोरदार हल्लाबोल केला आहे. यावेळी त्यांनी लोकसभा निवडणुकीत काँग्रेस नेते राहुल गांधी आणि प्रियंका गांधी यांना जाहीर आव्हान दिलं आहे

उन्नावचे खासदार साक्षी महाराज यांनी मीडियाशी संवाद साधताना राहुल गांधी आणि त्यांची बहीण प्रियंका गांधी यांना आव्हान दिलं. "प्रियंका गांधी किंवा राहुल गांधी, हिंमत असेल तर त्यांनी माझ्यासोबत उन्नावमध्ये येऊन निवडणूक लढवावी" असं म्हटलं आहे.

उन्नावची जनता आपल्यासोबतच असल्याचं ते स्पष्टपणे सांगतात. त्यामुळे काँग्रेसचा कोणताही मोठ्यातला मोठा नेता मग त्या प्रियंका गांधी असो वा राहुल गांधी, उन्नावमध्ये येऊन त्यांच्यासोबत निवडणूक लढवू शकतात असं त्यांनी म्हटलं आहे. लोकसभा निवडणुकीच्या आधी होत असलेल्या पाच राज्यांच्या विधानसभा निवडणुकांबाबत इंडिया आघाडीमध्ये सध्या गदारोळ सुरू आहे. 

एकीकडे मध्य प्रदेशात गेल्या निवडणुकीत विजयी झालेल्या सपा उमेदवारांसमोर काँग्रेसने आपले उमेदवार उभे केल्याने समाजवादी पक्ष संतापला आहे. उत्तर प्रदेश काँग्रेसचे अध्यक्ष आणि सपा प्रमुख अखिलेश यादव यांच्यात शाब्दिक युद्ध रंगताना दिसत आहे. याच दरम्यान, आता साक्षी महाराज यांनी काँग्रेस नेत्यांना जाहीर आव्हान दिलं आहे. एका हिंदी वेबसाईटने याबाबतचे वृत्त दिले आहे.