"आपण तर खरोखरच मोठी 'पनौती' निघालात, हुड्डांनाही..."; आचार्य प्रमोद कृष्णम यांचा राहुल गांधींवर निशाणा

आचार्य प्रमोद कृष्णम यांनी राहुल गांधी आणि भूपेंद्र सिंह हुड्डा यांना 'पनौती' म्हटले आहे...

हरियाणा विधानसभा निवडणुकीची मतमोजणी सुरू असून भाजपने बहुमताचा आकडा पार केला आहे. यातच आता, कल्की पीठाधीश्वर तथा काँग्रेसचे माजी नेते आचार्य प्रमोद कृष्णम यांनी काँग्रेस खासदार राहुल गांधी आणि माजी मुख्यमंत्री भूपेंद्र सिंह हुड्डा यांच्यावर थेट निशाणा साधला आहे. आचार्य प्रमोद कृष्णम यांनी राहुल गांधी आणि भूपेंद्र सिंह हुड्डा यांना 'पनौती' म्हटले आहे.

कल्कि पीठाधीश्वर आचार्य प्रमोद कृष्णम यांनी एक्सवर पोस्ट करत म्हटले आहे, "राम मंदिराचे "नाच गाणे" हुड्डाजींना घेऊन बुडाला राहुलजी, आपण तर खरोखरच फार मोठी "पनौती" निघालात." महत्वाचे म्हणजे, हरियाणामध्ये एका निवडणूक सभेला संबोधित करताना राहुल गांधी यांनी, राम मंदिराच्या उद्घाटनावेळी नाच-गाणे सुरू होते, असे म्हटले होते. राहुल गांधी यांच्या या वक्तव्यावर सादू-संतांनी आक्षेप घेतला होता. 

राम मन्दिर का “नाच गाना”
हुड्डा जी को ले डूबा राहुल जी, आप तो सच में बहुत बड़ी “पनौती” निकले. @RahulGandhi@DeependerSHooda@BhupinderShooda

— Acharya Pramod (@AcharyaPramodk) October 8, 2024

भाजप खासदार गिरिराज सिंह यांनीही साधला निशाणा -  
केंद्रीय मंत्री तथा बिहारमधील बेगूसरायचे खासदार गिरिराज सिंह यांनी रुहुल गांधींवर जोरदार निशाणा साधला आहे. गिरिराज सिंह यांनी मंगळवारी सोशल मीडिया प्लॅटफॉर्म एक्सच्या माध्यमाने थेट लोकसभा विरोधीपक्षनेते राहुल गांधी यांच्यावरच निशाणा साधला आहे. "आपण फॅक्ट्रीवाली जिलेबी राहुलजींसाठी आणली आहे. माननीय खर्गेजी यांनी राहुलजींचा पत्ता सांगावा. ती जिलेबी कुठे पाठवू?" अशी पोस्ट त्यांनी केली आहे.