Russia-Ukraine War: तिसऱ्या महायुद्धाला सुरुवात? जाणून घ्या पहिल्या आणि दुसऱ्या महायुद्धाची कारणे

Russia-Ukraine War Update: रशियाने युक्रेनमधील 11 शहरांवर हल्ले करुन तेथील लष्करी ठिकाणे उद्धवस्त केले आहेत. यानंतर NATO रशियावर कारवाई करण्याच्या तयारीत आहे. यावरुन आता जगावर तिसऱ्या महायुद्धाचे सावट आहे.

रशिया आणि युक्रेनमधील वाद शिगेला पोहचला आहे. रशियाने युक्रेनमधील 11 शहरांवर हल्ले करुन तेथील लष्करी ठिकाणे उद्धवस्त केले आहेत. यानंतर NATO रशियावर कारवाई करण्याच्या तयारीत आहे. यावरुन आता जगावर तिसऱ्या महायुद्धाचे सावट आहे. हे तिसरे महायुद्ध टाळण्याचे अनेक देशांचे प्रयत्न आहेत, पण युद्ध झालेच तर जगावर मोठे परिणाम पडणार आहेत.

रशियाचे अध्यक्ष व्लादिमीर पुतिन यांनी बेलारुस मार्गे आपले सैन्य पाठवले आहेत. डेली मेलच्या वृत्तानुसार, कीवमधील गृह मंत्रालयाच्या हवाल्याने म्हटले आहे की, रशियन हल्ल्यात अनेक युक्रेनियन लोक मारले गेले आहेत. या हल्ल्याची भीषणता सोशल मीडियावरील अनेक व्हिडिओंमध्ये पाहायला मिळत आहे.

रशियाने युक्रेनवर आपली पकड मजबुत करायला सुरुवात केली असून, रशिया आणि युक्रेनमधील युद्धाला सुरुवात झाली आहे. यावरुन आता तिसऱ्या महायुद्धाचा धोका वाढला आहे. दुसरीकडे, अमेरिका, फ्रान्स, ब्रिटन आणि जर्मनीसारखे 'नाटो' देश युक्रेनच्या संरक्षणासाठी संयुक्त कारवाई करू शकतात.

जगाला आधीच दोन महायुद्धांचा सामना करावा लागला आहे. त्या काळात संपूर्ण जगात कोट्यवधी लोकांचे मृत्यू तर झालेच पण जगावर अनेक दिवस उपासमारीची परिस्थिती निर्माण झाली. त्या परिस्थितीमुळे आता तिसऱ्या महायुद्धाला लोकही घाबरत आहेत. आज आपण पहिल्या आणि दुसऱ्या महायुद्धांची कारणे जाणून घेणार आहोत.

पहिले महायुद्ध का झाले?- पहिल्या महायुद्धाची जबाबदारी कोणताही देश घेत नाही. पहिल्या महायुद्धाचे कारण ऑस्ट्रिया-हंगेरी साम्राज्याचा वारस आणि त्याच्या पत्नीची हत्या असल्याचे मानले जाते. सुमारे 108 वर्षांपूर्वी, जून 1914 मध्ये ऑस्ट्रिया-हंगेरी साम्राज्याचे वारस आर्कड्यूक फर्डिनांड यांनी आपल्या पत्नीसह बोस्नियामधील सारेवोला भेट दिली होती.

तर, 28 जून 1914 रोजी त्यांची हत्या झाली, सर्बियावर खुनाचा आरोप होता. एका महिन्यानंतर ऑस्ट्रियाने सर्बियाविरुद्ध युद्ध पुकारले. हळूहळू अनेक देशांनी त्यात उडी घेतली आणि अशा प्रकारे दोन देशांच्या युद्धाचे रूपांतर पहिल्या महायुद्धात झाले.

त्या लढ्यात जर्मनी, फ्रान्स, ब्रिटन, अमेरिका आदी देश सक्रिय होते. चार वर्षांच्या लढाईनंतर 11 नोव्हेंबर 1918 रोजी जर्मनीच्या आत्मसमर्पणाने पहिले महायुद्ध संपले. 28 जून 1919 रोजी जर्मनीने करारावर स्वाक्षरी केली, ज्याअंतर्गत त्यांना आपला मोठा हिस्सा गमवावा लागला होता.

दुसऱ्या महायुद्धाचे कारण- पहिल्या महायुद्धाची जबाबदारी जर्मनीवर लादली गेली आणि व्हर्सायच्या तहावर स्वाक्षरी करण्यास भाग पाडले गेले असे सांगण्यात आले. पहिल्या महायुद्धाच्या समाप्तीच्या 20 वर्षांनंतर, जर्मन राष्ट्रीय समाजवादी (नाझीवाद) पक्षाचा नेता अॅडॉल्फ हिटलरने व्हर्सायचा करार रद्द करण्याची घोषणा केली.

मार्च 1938 मध्ये जर्मनी आणि ऑस्ट्रिया एकत्र आले आणि हिटलरच्या सैन्याने 1939 मध्ये चेकोस्लोव्हाकियावर कब्जा केला. 1 सप्टेंबर 1939 रोजी जर्मन सैन्य पोलंडमध्ये दाखल झाले तेव्हा दुसरे महायुद्ध सुरू झाले. यानंतर जगाचे दोन भाग पडले. एकीकडे मित्र राष्ट्र होते ज्यात अमेरिका, फ्रान्स, ब्रिटन, सोव्हिएत युनियन यांचा समावेश होता तर दुसरीकडे जर्मनी, जपान आणि इटली यांचा समावेश असलेले राष्ट्र होते.

हिटलरच्या सैन्याने नॉर्वे, डेन्मार्क, लक्झेंबर्ग, बेल्जियम, नेदरलँड आदी देश काबीज करायला सुरुवात केली. अचानक जर्मन सैन्यानेही सोव्हिएत संघाविरुद्ध युद्ध पुकारले. तथापि, जर्मन सैनिक सोव्हिएत युनियनच्या सैन्यासमोर उभे राहू शकले नाहीत. हिटलरने 30 एप्रिल 1945 रोजी आत्महत्या केली आणि 8 मे 1945 रोजी जर्मनीने आत्मसमर्पण केले.

जर्मनीने आत्मसमर्पण करुनही जपान यासाठी तयार नव्हता. त्यानंतर अमेरिकेने 6 ऑगस्ट 1945 रोजी हिरोशिमा आणि 9 ऑगस्ट 1945 रोजी नागासाकीवर अणुबॉम्बने हल्ला केला. जपानने बळजबरीने आत्मसमर्पण केले तेव्हा दुसरे महायुद्ध 2 सप्टेंबर 1945 रोजी संपले.